السلام عليكم ورحمة الله وبركاته
هاد الاسبوع صاوبت حليوات باللوز نتمنى يعجبوكم الاشكال وتجربوهم راهم جاو كيدوبو فالفم
على بركة الله مقادير العجين
قرعة ماء الزهر + مارغرين اللدة 250 غ +قبصة ملح + بيضة
ندلك الزيدة ونضيف البيضة والملح وماء الزهر ونجمع بالدقيق وتكون لعجبنة قاصحة مزيان وندلكها مزيان
الحشوة كنحتاجو لوز وطريقته كالتالي كنغلي الماء مزيان ونطفي البوطة ونلوح اللوز ونخليه واحد شوي ونصفيه ونقشرو وهكاك كنضمنو ان الحلوة ديالنا ماتغملش وكدالك اللوز ماكيتغيرش لونو الى الاحمر او البني
ونخليه ينشف وفي الغد كنطحنو الطحنة الاولى والمرة الثانية نضيف معاها سنيدة
كنضيفله ملعقة كبيرة مربى وملعقة زبدة ونجمع بماء الزهر وندلك الحشوة مزيان باش ماتخرجش من العجين ملي نشكلوهااا ممكن تنسموها باش بغيتو انا قضيت بلي كان عندي فالبيت
الشكل الاول الكعبة
كنسرح لعجين في الماكينة ونشكل لكعيبات
حلوة التوأم
كنقطع العجين مربعات ونضع حربول صغير من الحشوة ونلف
ثم ندهن الرؤوس ببياض البيض ثم نمررهم فاللوز مهرمش اوكاوكاو حسب دوقكم
هنا ملي طابت
الشكل الثالت حلوة الثومة
كنقطع العجين مربعات او دوائر ونضع كويرة من الحشوة ونكونو ضفنا ليها لون احمر غير شوي وصافي
ونجمع العجين ونشكل كويرة ونزول الزوائد ونحاول نقاد ليها الراس لفوق
ثم نفلحها بالموس شي 8 ديال الضربات فالجناب باش نحصلو على الشكل ديال الثومة
ملي طابت غطستها فالعسل مخفف بماء الزهر ودرتها فكويغطات
ملاحظة:
ضروري حلويات اللوز نخليوهم وقت طويل عاد باش نطيبهم انا درتهم فالعشية وفي الغد عاد طيبتهم
والكعبة نتقبوها 3 ثقبات عاد نطيبوها باش ماتنفخش لينااا